غموض التوأم الصامت

إرتباط التوأم ببعض شئ طبيعي واحنا بنعتبره شئ منطقي شخصين إقتسموا كل شئ بينهم بداية من البطن اللي شالتهم فإرتباطهم ببعض وتشابه الصفات بينهم بيكون شئ محمود وطبيعي ولكن أحياناً بيكون إرتباط التوأم ببعض إرتباط غريب وغير مفهوم ومخـ,ـيف تعالا نشوف مع بعض قصه التوأم الصامت واللي تعتبر من الغرائبيات دي القصه التانيه اللي وعدتكم بيها وهي قصه حقيقيه وموثقه

القصه بتبدأ بزوج وزوجة من أصول أفريقية الزوج اسمه (أوبري)والزوجه اسمها (جلوريا ) قرروا يهاجروا لبريطانيا وفي ١٣ أبريل سنه ١٩٦٣م ده كان توقيت ولاده التوأم (جون وجينيفر ) واللي من يوم ولادتهم وعـ,ـلاقتهم ببعض غريبه.. الأم بتحكي إنها لما كانت تبعدهم عن بعض وهما لسه رضع يفضلوا يبكوا ويصرخوا لحد لما يرجعوهم لبعض تاني وكأنهم حاسين بإنهم بعدوا عن بعض ..

ولما كبروا شويه وتخطى عمرهم السنتين ماكنوش بيتكلموا خالص ولا بينطقوا كلمه وده كان غريب.. بس الأم مهتمتش وقالت إن في أطفال كتير بيتأخروا في الكلام والنطق ولكن الأب كان بيجزم إنهم بيتكلموا لما بيبقوا مع بعض في أوضـ,ـتهم لانه كان بيتجسس عليهم وسمعهم بنفسه أكتر من مره وهما بيتكلموا مع بعض بلغه غريبه هو مش فاهمها ..استمر الصمت مع الأختين لحد ما وصولوا لسن ٦ سنين ولكن الأب كان مستمر في محاولاته في التجسس عليهم عشان يتأكد إنهم بيتكلموا مع بعض لما بيبقوا لوحدهم ولكن البنتين فجأه مبقوش بيتكلموا خالص لا باللغه الغريبه ولا بأي لغه وكأنهم عاملوا معاهده بينهم بالصمت التام ومن هنا بدأت معاناه الأختين هما فضلوا مستمرين في الصمت ..

فلما دخلوا المدرسه كان نص الطلبه بيتريق عليهم والنص التاني خايف منهم لانهم كان فيهم شئ غريب بيتحركوا مع بعض في نفس الوقت. يقعدوا علي الديسك مع بعض ويقوموا مع بعض في نفس اللحظه حركات جـ,ـسمهم واحده وكأنهم شخص واحد وإتقسم نصين..جون وجينيفر كانت تعابير وشهم ثابته خاليه من المشاعر لا بيظهر عليهم ملامح الفرح والإبتسامة ولا الحزن والبكاء.. كانت تعابير وشهم صامته حرفياً .. وبتحكي الأم إنهم لما كانوا بيتجمعوا علي السفره للأكل كان الاختين بيرفضوا يأكلوا معاهم وكانوا بيطلبوا يأكلوا لوحدهم وده بدون ما واحده منهم تنطق كلمه ..

الأم كانت بتفهمهم وبتعمل اللي يريحهم لعلهم يتقبلوا محاولاتها في إنهم يتكلموا في يوم من الأيام..ولكن الأم ماكنتش علي علم أن جون وجينيفر كان ليهم رأي تاني وقرروا يصنعوا عالم خاص بيهم بعيد عن كل الناس وصل سن البنتين لسن ل ١٣ سنة وهما لسه متمسكين بحاله الصمت برغم أن الاختبارات الطبيه كلها بتؤكد أن الأختين معندهمش أي مشكله طبيه تمنعهم من الكلام ..وده اللي كان محير الأطباء ليه هما مصرين علي الصمت هل اللي بيحصل من الأختين ده تمثيل.. ده لو تمثيل يبقوا هما أكتر ممثلين إلتزموا بأدوارهم في التاريخ ومن هنا قررت الأم إنها تدخلهم مدرسه لذوي الاحتياجات الخاصه على أمل أن عقده لسانهم تتفك وعشان ترحمهم من سيل التنمر اللي كانوا بيتعرضوا ليه من زمايلهم في المدرسه واللي أثرعليهم نفسياً بعد انتظام الاختين في المدرسه الجديده بدأوا يتحسنوا نفسياً وكمان بدأت تظهر علي وشوشهم ملامح الإبتسامه لاول مره من وقت ولادتهم ..

ودي كانت خطوه مهمه وغير مسبوقه ولكن كانوا لسه محتفظين بحاله الصمت ..بدأ الاخصائيين يشجعوهم بإخراج طاقتهم عن طريق الكتابه وفعلاً ده حصل والأختين بدأوا يكتبوا قصص وروايات والغريب أن القصص والروايات اللي كتبوها كانت وكأنها لكاتب وأديب محترف ولكنه مجنون.. القصص منظمه ومنسقه ولكنها مخيفه كلها ملونه بالسواد ومطعونه بسكاكين ملوثه بالدم وده بيعكس الغضب اللي بداخل الأختين الاخصائيين خلال جلسات التخاطب اللي كانوا بيعملوها مع الأختين كانوا بيقولوا أن جون كانت بتبقا على وشك النطق والكلام ولكن كانوا بيحسوا أن أختها جينيفر مسيطره عليها بشئ خفي وبتمنعها من الكلام وده كان بيبان من تعابيرات وشوهم ونظراتهم لبعض وده دفع الاخصائيين لفصل الاختين عن بعض عشان يكسروا الإرتباط المرضي اللي بينهم ولو في واحده من الاختين بتمنع التانيه من الكلام فلو تم فصلهم هتتحل المشكله دي ولكن قبل فصل الأختين بيوم وصلت مكالمه تليفونيه لمعالج من المتابعين لحاله الأختين

أسمه (د . تيم توماس ) الصوت اللي بيتكلم كان لمجهول وصاحبه الصوت بتتكلم بسرعه جداً لدرجه أن المعالج فهم الكلام بالعافيه الكلام اللي سمعه كان “مساء الخير يا مستر توماس إحنا التوأم لو مفصلتوناش عن بعض هنبدأ نتكلم الأسبوع القادم ..بنوعدكم ” وإنتهت المكالمه ..الراجل ماكنش مصدق هو فعلاً سمع صوت واحده من التوأم ..بلغ مستر توماس إداره المدرسة بالمكالمه وتفاصيلها اللي بدورها بتتراجع عن فكره فصل الأختين على أمل أنهم ينفذوا وعدهم ويتكلموا ولكن بعد مرور الأسبوع الأختين متكلموش وخلفوا وعدهم وهنا نفذت إداره المدرسة عمليه الفصل بين الأختين بعد فصل الاختين اللي حصل كان غريب (جينيفر) فقدت السيطره علي جـ,ـسمها فجأه وبدأ يحصلها حاله شديده من التشنج وبقت شبه مشلوله ..المخ مبقاش قادر يوصل أي أشارات لأعضاء الجسم بدون سبب واضح و(جون )دخلت في حاله من الاكتـ,ـئاب الحاد ورفضت الأكل والشرب ووشها بقا شاحب وملامحها ثابته ودموعها مبتوقفش كل ده حصل بمجرد فصلهم عن بعض وهنا اضطرت إداره المدرسة إنهم يرجعوا التوأم لبعض تاني .